قال جامعة قال

الأول كل سنة و أنتم طيبين للي ملحقتش أعيد عليهم و لكل الموجودين

عـــــــــــــــــــام دراســــــــــــــي جديـــــــــــــــد

كل سنة و أنتم طيبين

واحد أو واحدة ظريف أو لطيفة (مش المغنية) بيقولوا لي

يا عم نموسيتك كوحلي أنت لسه فاكر

ده الدراسة بدأت من الأسبوع اللي فات

عارف و الله بس بالنسبة ليا و لملايين الحشود الغفيرة

الدراسة من الإسبوع ده

جامعة تاني و تالت و رابع و خامس

إرحمونا بقي و ادونا الشهادة خلونا نخلص

أنا عن نفسي بحس إن الجامعة أو كليتي العملية

ذي ما بسمعهم و هم بيقولوا لنا

بحسها مكان للتعتيم مش التعليم أبدا

بس الحاجة الوحيدة اللي بستفاد منها هي التأمل

مهو بيني و بينكم التأمل برده من شروط الريلاكسيشن

اللي أنا دايما و أبدا واجع دماغكم بيه

بس حقيقي بتيجي عليا أيام مبقدرش أسيطر فيها علي نفسي من كتر الغيظ

لما تصحي من النجمة عشان تعرف تركب مواصلاتك بالعافية

عشان تلحق المحاضرة الأولي

و بعد ده كله تلاقي الدكتور قاعد باللاب توب و عمال يلك

و إحنا طبعا فهمين كل حاجة إلا حاجة واحدة

هي المادة دي بتتكلم عن إيه أصلا

ماشي يا دكتور روح يا شيخ و تعالي بسرعة

و اللي يغيظ أكتر و أكتر إنه كلها محضرتين و يخلص الكورس

قال إيه عشان الميد تيرم

و أنا كان مال أهلي طاب فهمنا حاجة الأول و بعدين إمتحنا فيها

ده مش سلق بيض

المهم بعض ما تخلص المحاضرة طبعا تبدأ السكاشن من أول يوم

و تروح السكشن بتاعك تلاقي الأوضة مفيهاش حتي كرسي واحد

كله إما محجوز أو منقول لسكشن تاني و أنت و حظك يا تقعد يا تقضيها

و شوية تلاقي معيد زي العسل داخل عليك

و قبل ما يقول السلام عليكم

يطلع كشف الأسامي و ياخد الغياب .. هو إحنا في حضانة يا ريس

المهم يقعد قد ما يقعد و إحنا برده عايزين نفهم

أنت بتقول إيه

و كل اللي طالع عليه يا بشمهندس

الدكتور بيشرح في المحاضرة و أنا بطبق علي الشرح

يا عم طبق براحتك مبقتش تفرق سينا من سونيا

و علي الظهر كده يحسوا فجأة إن إحنا بني آدم و من حقنا حبة راحة

فتخرج اللي يروح يصلي الظهر جماعة بالمسجد

و اللي يروح الكافيتريا و اللي يروح في داهية

و اللي ياخدها من قصيرها و يروح قبل نهاية اليوم

و أنت ماشي في وقت الريست و معدي علي الكليات الرايقة

تحس بالإحباط و الذل

لما تبقي مش قادر تاخد نفسك من الطلوع و النزول طول اليوم في كليتك

وتيجي تلاقي الأمامير دول قاعدين بالجنينة و بيلعبوا صلح

(لعبة مسلية جداااا)

ربنا يعينكم و يديكم الصحة و ياخد مننا و يديكم

قولوا آمين

ساعتها الواحد بيحس بالندم إن دخل هندسة

و أصبر نفسي و قول يا واد بكرة تبقي باش مهندس قد الدنيا و البحر

بس هو أمتي بكرة ده ؟!!!!!!!!

و تتمشي شوية و تعدي علي أصحابك بالكليات اللي حوليك

و تلاقي الواد ميشو قاعد مع البت لولو

و ماسكين كتاب قال إيه بيذاكروا اللي فاتهم

و إحنا لسه في أول يوم طاب إيه بقي اللي فاتهم

نفسي أعرف

كل ما قول لحد كده يقول ليا بكرة يجي اليوم و تعرف

طاب هو إمتي بكرة ده ؟!!!!!!!

و في آخر اليوم و أنت مروح تبقي عايز اللي يشيلك كلك علي بعضك

و يرميك في السرير

و لما تيجي تفتح الكتب عشان تشوف اللي خدته النهاردة

تلاقي كل حاجة في الباي باي

و تحس إنك مكنتش في المحاضرة من أساسه

و إن الدكتور مكنش موجود

و تبدأ تتخيل حاجات عجيبة بعيد عنكم

علي العموم سامحوني طولت عليكم شوية

بس أعمل إيه

قال جامعة قال

كلمة Relaxation

*********************

حب ما تعمل حتي تعمل ما تحب

و هي الدنيا إيه غير حب و حنان و حاجات صغيرة فوق بعضها

كل سنة و أنتم طيبين و عام دراسي سعيد علينا و عليكم يا رب

و متنسوش تشربوا اللبن الصبح يا حلوين يا أممير

cold air

عـــيد سعـــيد

حقيقي أحلي عودة

لأنه أحلي عـــيد عشان بشكل جديد

ده أول عـــيد يمرعليا بالمدونة

كل سنة و أنتم بألف خير و صحة و سلامة

يا رب نكون خرجنا من رمضان مقبولين و مش محرومين

شكرا لكل اللي سأل عليا و سامحوني علي الغيبة الطويلة

ملحوظة

أنا مش هتنازل عن العدية و كل واحد عارف اللي علية

و الكراسة الصفرا مكتوب فيها كل حاجة

عايز العدية تنزل ترخ عليا

^_^

ربنا يجعل أيامنا كلها خير و سعادة

و أهلا بالعيد

آسف علي التأخير

الأول السلام عليكم

بجد و الله ليكم وحشة

بعتذر عن تأخيري و عدم متابعة بوستاتكم في الأونة الأخيرة

و ده كان خارج عن إرادتي

بس أنا شاكر جدا ليكم لأنكم أثبتوا ليا إنكم أصدقاء

زي الفل

مهما دبل و صاحبه سابه من غير ميه لسه ريحته فيه

و ألف شكر لكل اللي نوروا بوست عيد ميلادي

و أكيد أنا قرأت كل تعليق و ضحكت زيكم بالضبط

شكرا علي خفة دمكم اللذيذة دي و بجد كنت في غاية السعادة

إن البوست و العيد ميلاد عجبكم

و يا رب أردهالكم و أنتم بكامل الخير و الصحة

لكن حقيقي التأخير كان ناتج من إني كنت بخلص ورق التدريب بتاعي

لأن التدريب ده إجباري و كان لازم يخلص قبل رمضان عشان أخلص أنا كمان

و الحمد لله أخيرا حصلت علي الختم بعد طلوع الروح

لأن الدكتور المهندس صاحب المكتب الهندسي اللي كنت بتدرب فيه

راسه و ألف سيف إن التدريب لازم ياخد كل فترة الأجازة الدراسية

لكن قدرنا نقنعه إن إحنا خلاص زهقنا و قرر يعطف علينا و يختم لنا الورق

بعد طلـــــــــــــــــــــــــــــــــــــــــــوع الروح

و هرجع تاني لريلاكسيشن مدونتي حبيبتي

اللي عرفت معناها بجد اليومين اللي فاتوا دول

صحيح صاحب بالين كداب و ستيين كداب

بس مش كداب أوي يعني

^_^

مرة تانية بشكركم كلكم و بعتذر عن التأخير

كلمة Relaxation

*-*-*-*-*-*-*-*-*-*-*

حقيقي أموت و أعرف إيه اللي دخل البنات كلية الهندسة المدنية

خليكم Relax و بدل ما أنتم خايفين علي نفسكم من الشمس

كان إيه اللي دخلكم مدني

أشربوا بقي مادام دماغكم ناشفة

و آخركم المكاتب و التصميم

خليكم مصممين

..........................................

رمضان كريم عليكم كلكم

أثبتت الدراسات أن الهدوء و الريلاكسيشن بيساعدوا الإنسان في فترة الصيام

بلاش الأكل الكتير عشان تعرفوا تصلوا التراويح

أشوفكم علي خير

يوم تاريخي

اليوم 20 / 8

بالفعل إنه يوم تاريخي

يوم ميلاد مؤسس الريلاكسيشن

يوم أن هبت علي الأراضي المصرية رياح الصقيع

Cold air

من الأخر أنا اتولد زي النهاردة

من حوالي 21 سنة و تلت أربع ساعات كده

و أكيد كل واحد بيعتز باليوم ده

أنا أقصد يوم ميلادي مش يوم ميلادكم

^_^

بس أنا الوحيد اللي بحس اليوم ده بكامل محتواه

من أول ما بخرج في أول النهار

حتي العودة إلي الديار بأواخر الليل

و أصبح من الطبيعي رؤية الإحتفالات العارمة من جميع أفراد الشعب باليوم ده

ففي العام الماضي امتلأت جميع شوارع العاصمة و المحافظات المجاورة

بالتهاني و الرسايل

و بقت سيرتي علي كل لسان

و صورتي علي كل الحيطان

^_^

ده كله غير الرسايل الرقيقة اللي وصلتني من المعجبين و المعجبات

و فرصة أشكرهم كلهم و بالأخص صاحبة الرسالة دي

و في اليوم ده انتشرت العديد من المظاهرات للمطالبة بجعل اليوم ده عيد الريلاكسيشن العالمي

لدرجة إن الأخبار و صلت لقناة CNN و الفضائية المصرية و الفضائية الشرقية كمان

و تصدرت صورتي صفحات الجرائد بالعديد من الدول لعدة أيام

و كنت في الفترة دي مش بعرف أمشي في الشارع خالص

عشان كان كل شوية واحد يوقفني و يطلب توقيعي

لدرجة إن اللي مكنش معاه حاجة أمضيله عليها كنت بمضيله علي إيده عشان ميزعلش

اللي بجد أسعدني هو تقدير الدولة ليا و إحتفالها بي بطريقتها

و قرار السيد الرئيس أبو جمال بعمل طابع بريدي يحمل صورتي الشخصية

و بالتالي أصدر البنك المركزي بطاقات إئتمان تحمل صورتي و وزعت أول كمية ببلاش

لزوم الدعاية و الإعلانات

ده غير الإشاعات اللي ملت البلد و الشارع الرياضي

و اللي كانت بتتكلم عن إنضمام cold air لصفوف النادي الأهلي

و دلوقتي جه اليوم اللي تميت فيه 21 سنة

حقيقي أنا مفرفش و مزقطط عالأخر

عقبال يا رب أما أجيلكم يوم ميلادكم و أردلكم الهدايا اللي مستني أشوفها

عايز الهدايا تنزل ترخ عليا

^_^

عقبال 100 سنة يا حازم

بس 100 كتير أوي

صحيح يا و لاد

مجلسنا اتحرق هيه

مجلسنا اتحرق هيه

و عمو حبيبي

الرئيس الباكستاني برويز مشرف اتعزل

مش بقلكم أنا يوم ميلادي أو اليوم ما قبل إستقبالي

يوم تاريخي

إخراج

حــازم شــرف

cold air

وجهة نظر

ليت النور مجرد كبسة زر

حالة تراودني كلما شاهدت مسرحية وجهة نظر

للرائع محمد صبحي

بالفعل عمل رائع يستحق التقدير

الطيور علي أشكالها تقع

الطيور علي أشكالها تقع

وقفت كثيرا أمام هذه الجملة

أسأل نفسي

هل هي بالفعل مثل من أمثال أسلافنا ؟
أم هي معلومة علمية بحته خاصة بعالم الطيور فقط ؟

وهل بالفعل الطيور علي أشكالها تقع ؟
و قصدت بسؤالي السابق عالمنا البشري

دخلت إلي كهفي لأنفرد بنفسي
لآخذ القرار
فأخذت نفسا عميقا و بدأت بالمشوار
و في الطريق
راودتني العديد و العديد من الأمثلة
التي نري فيها أنفسنا نردد تلك الكلمات
( الطيور علي أشكالها تقع )
فكانت الأمثلة كلها تصب في صالح الجملة و مضمونها

ففرحت و بأعلي صوت قلت
الأن أيقنت حقا الطيور علي أشكالها تقع
و أخذت أجري و أجري كأني وجدت إكتشاف

لكن

وسط كل هذه الفرحة
ارتطمت بحائط صلد فتحولت أفكاري لأشلاء
فوقفت ثانيا لألملم ما سقط مني
و حاولت جاهدا أن أجد طريق آخر كي أسلكه لأكمل ما بدأت و أرتب أفكاري

لكن للأسف

لم أجد لفكري طريقا آخر
فقررت بشجاعة و إصرار
أن احطم الجدار
فضحك بسخرية و قال لي ما قال

أأيقنت أن الطيور علي أشكالها تقع هه هه
أفرحت بتلك الأمثلة الوردية هه هه
هه هه
هه هه هه هه هه

يا عزيزي تفكيرك غير سليم
و وجب علي تنبيهك

احذر ( الخداع و اللؤم )
فقد تجد صديقا أو حبيبا لتقول لنفسك
لقد وجدته فالطيور علي أشكالها تقع
و بعد قليل تجد أنه لا مجال لذكر هذه الجمله

و فجأة حل الصمت و وجدت نورا ساطعا

رأيت الطريق ظاهرا أمامي
فسألت نفسي في دهشة
أين الحائط الصلد و كيف اختفي ؟!

و وسط كل هذه الحيرة
قررت الرحيل دون إكمال الطريق
أو حتي أخذ القرار

فهل أنا علي حق أم الحائط أحق ؟!!!

cold air

كلمة Relaxation
*-*-*-*-*-*-*-*-*-*-*-*
حدثنا ديننا الإسلام بهذا الشأن كثيرا
فنجد قول الصديق

(صلي الله عليه و سلم )
المرء علي دين خليله

و بقرآننا العظيم

الطيبون للطيبات و الخبيثون للخبيثات

فلقد خلق لنا الله العقل لنحدد من هو الطيب و من هو الخبيث
و نهي الإسلام عن التواكل و عدم التفكير
فنصيحتي لي و لك
لا تنخدع بالمظاهر و تقنع نفسك بأشياء قد تجدها بالنهاية أوهام نسجتها بفكرك و خيالك الواسع
و كالعادة أذكركم
الإسترخاء يساعدك علي التركيز و الإستمتاع بالوقت

BE RELAX & ENJOY

خليك ريلاكس خليك تقيل

عالصخرة قاعد لوحدي أغني
حبة لحليم علي عيني يا ليل

سمعتني موجة مالبحر جايه
قالتي يـــاه صوتك جميل

قلتلها لا انت اللي أحلي
و عندي ليك مليون دليل

ضحكت وقعدت عالصخرة جنبي
حسيت بقلبي عايز يميل

قربت منها و قلت أسلم
لكن خسارة كان مستحيل

البحر نادي يا موجة يلا
ادمنا لسه مشوار طويل

قالتله ماشي يا بحر حبة
د أنا لسه قاعدة و اليوم جميل

بصوت حنين قالتلي ماشية
ودعها قلبي بصوت عليل

ماشي يا بحر بقي تيجي منك
غدار صحيح وكمان سئيل

خلاص يا قلبي دالموجة مشيت
خليك ريلاكس خليك تقيل

cold air

كلمة Relaxation

*-*-*-*-*-*-*-*-*-*-*-*

بكل يوم في حياتنا بنمر بمواقف عديدة

قد يكون العقل هو صاحب القرار في معظمها

لكن للقلب قرارات يجب إحترامها و تقديرها

و من الظلم الحجر علي آراءه

الإسترخاء و الهدوء بيساعدك علي التفكير

و ترتيب الأوراق و أخذ القرار السليم

نصيحتي ليك

خليك ريلاكس خليك تقيل

خائف من الحب

تري من هذا الطفل الحزين ؟!

أراك في يقظتي و منامي
في كل درب أسلكه و في أحلامي

أأنت روح ترافقني ؟
أم جزء من كياني ؟

عفوا يا صغيري أتعرفني ؟
و لماذا تتبعني ؟!
تكلم لا تخف فصمتك لن ينفعني

أعرفك جيدا فأنت أبي و من يرعاني

نظرت لوجهه و جلست كي يراني

أأشبه والدك ؟!
لا تبكي يا صغيري فسوف أساعدك

أخذته من يده و سرنا بالطريق
ففرح و ظل يجري كطائر طليق

يريد أن يغرد بصوته الرقيق
كما لو كان وردا مليئ بالرحيق

سألته من أمك ؟ فقال لا أعرف
سألته ما اسمك ؟
فقال لي ( قلبك )

فتركت يده رعبا و و شعرت ببرد شديد
أأنت طفل عادي أم من مكان بعيد ؟!!

فقال لي في همس أنا حب جديد
ستراني كل يوم مادمت أنت وحيد
حتي تجد لي أمي و يعود وجهي سعيد .
cold air

كلمة Relaxation

*--*--*--*--*--*--*--*--*--*

الخوف من الحب كثيرا ما يقابل الإنسان
قد يكون نوع من التردد أو خوفا من تحمل المسؤلية
أو خوفا من المجهول

و قد يكون غير هذا أو ذاك

فقد يكون خوفا علي من تحب
أن يكون فريسة للهموم
إن ضاع الحب

( لا العاشق مرتاح و لا الخالي مرتاح )

حرية التعبير و الثقة بالنفس

هل أنت ممن يجيدون التعبير عن أنفسهم ؟

أم أنت ممن يجد صعوبة في التعبير عن ذاته ؟

-_-_-_-_-_-_-_-_-_-_-_-

فكر كويس قبل الإجابة

-----------------------

1- أنا بعرف أعبر كويس أوي عن نفسي

........

2- أنا مجربتش قبل كده.. بس أعتقد أني بعرف

........

3- الصراحة لا.. بلاقي صعوبة في توصيل رأيي

........

4- يا عم كبر يعني هم مستنيين رأيي دا كوسه وبعدين هم هيسيبوني في حالي ؟!

........

5- مش فاهم تقصد إيه من السؤال بالضبط

............................

الخمس آراء أكيد مختلفين

بس بيربطهم ببعض صفة واحدة

( الثقة بالنفس )

شوف ردي عليك و ناقشني فيه وعبر عن رأيك

-_-_-_-_-_-_-_-_-_-_-_-

1- لو بتعرف تعبر عن رأيك كويس

طاب بتعرف تختار الطريقة السليمة للتعبير عن رأيك

وبتعرف الوقت المناسب اللي تتكلم فيه

طاب بتتقبل النقد و آراء الأخرين

2 - لا أكيد جربت قبل كده

و إلا أنت شخصية إنطوائية أو مفكرتش كويس قبل الإجابة عالسؤال

أو مفهمتش قصدي كويس

طاب علي الأقل جرب تقول رأيك في الموضوع وبكل حرية

بس أنت عارف يعني إيه حرية

3 - مش عيب أبدا تقول مبعرفش

بس حاول علي قد ما تقدر تقرأ كتير وتثقف نفسك

عشان تزود ثقتك بنفسك و تعرف توصل رأيك للآخريين

و أنا معاك إن حسن الكلام موهبة من الله بس ممكن زرعها في الإنسان بالتربية في الصغر أو بالإطلاع و المحاورة في الكبر

بس انت جرب و ادعيلي

4 - مش لازم هم يستنوا رأيك

لازم أنت تقول رأيك وتكون إيجابي

فمن اجتهد فله أجر

و من اجتهد و أصاب فله أجريين
أما لو اللي بيمنعك من التعبير عن رأيك هو الخوف

علي نفسك أو علي اللي بتحبهم فلازم تفكر كويس بالطريقة المناسبة

فكم من آراء دفنت مع أصحابها

ولكن يوجد العديد والعديد من الأراء ولدت بموت صاحبها

5 - أعتقد إن السؤال واضح بس اللي اقصده أنت مش حد تاني

-_-_-_-_-_-_-_-_-_-_-_-

كلمة Relaxation

ثقتك بنفسك شيئ ضروري بعيدا عن الغرور و بعيدا عن الخوف من رأي الآخريين في رأيك لكن يجب إختيار الإسلوب المناسب للتعبير عن رأيك فهو بالنهاية منسوب لك إيجابا أو سلبا و بالفعل

صوتك العالي دليل علي ضعف شخصيتك و قلة ثقتك بنفسك

لغة الحوار نابعة من عقلك توصلها للآخر بصوتك ليس بيدك

الهدوء طريق ممهد لتوصيل رأيك

فأحرص علي هدوءك لتصل بسلام

Be Relax & Enjoy

حاولت علي قد مقدر أرصد مختلف الحالات في إجاباتي

لو عندك إجابة تانية فكلي آذان صاغية

أنا مش أنا

الصراحة مش هلاقي أحسن من العنوان ده
عشان أعرف أحل الواجب اللي بعتته ملاك Relaxation

Angel Love

الواجب مكون من جزأين

الأول : اذكر 16 صفة من صفاتك

الثاني : مرر الواجب لمن تحب

وبالتالي الواجب لكل واحد علي سطح

Relaxation

لأني بحبكم كلكم

او بمعني أصح هدبسكم كلكم

^_^

أنا مش أنا

ده عنوان الموضوع

و أكيد عدد كبير مننا سمع الأغنية الشعبية

(أنا مش أنا) أو (أنا مش عارفني)

أكيد انا محطتش العنوان ده حبا في الأغنية يعني

بس حسيت إني لازم أتقمص شخصية غيرشخصيتي

حتي أستطيع أن أنظر بداخلي

دون تجميل و دون ظلم لنفسي أيضا

1 - أكيد من محبي الهدوء و الريلاكس

----------------------------------------

2 - بيتوتي و بحب الخصوصية

و لست من هواة التدخل في شئون الناس

----------------------------------------

3 - إنسان حبوب و بحترم الكل

ولكني ممن يستفزهم الغباء والعبط

اما الإستعباط فأنا جدير بالتعامل مع محبيه

----------------------------------------

4 - مستمع جيد للموسيقي

و كان نفسي يكون ليا نشاطات فنية بس...

----------------------------------------

5 - أحب أن أكون القائد

لكن لا أسعي لأخذ مكان ليس لي

----------------------------------------

6 - بحب السفر بس مش بفضل

الإستقرار بعيدا عن الوطن أوعن منزلي

لمدة طويلة

----------------------------------------

7 - حبي للقراءة بدأ منذ فترة قصيرة

و تحديدا منذ أن بدأت التدوين في

Relaxation

----------------------------------------

8 - منظم في شغلي المطلوب مني ( بالتنتوفة )

لكن للأسف

غير منظم بالبيت و بالأخص غرفتي

----------------------------------------

9 - بتكلم مع الكبار كأني من سنهم

أما

مع الأطفال فأنا أعيل منهم

----------------------------------------

10 - بحب الصداقات وإجتماعي

بس مش من الدرجة الأولي

يمكن التانية

^_^

----------------------------------------

11 - بكون سعيد جدا لما بساعد المحتاجين

و أنا ممن يقولون الحق و لو علي رقبته

----------------------------------------

12 - كاتم أسرار من الدرجة الأولي

و لكني أجد صعوبة في إعطاء سري لغيري

----------------------------------------

13 - دمي حار جدا ( سبايسي )

و دي من نقاط ضعفي

اللي بحاول أعالجها بالهدوء و الإسترخاء

----------------------------------------

14 - من المؤيدين لمقولة

الراجل راجل و الست ست

و محبش الست المسترجلة

و لا الواد المايص

----------------------------------------

15 - إنسان بصري في معظم الأوقات

و من محبي المظهر الجيد وليس المنظرة

سواء للمرأة أو الرجل

و بالنسبة للأكل فمظهر الأكل شئ أساسي

----------------------------------------

16 - بتقولو عليا إني من أصحاب الدم الخفيف

و ردي عليكم

إن عيونكم الجميلة بتشوف كل شئ جميل

و يا رب أكون قدرت أحل الواجب

بصورة كويسة

و أعرفكم أكتر علي شخصيتي

ملحوظة........

كملوا انتوا بقي

أيوة ( ملحوظة رفيعة )

اللي هينسي ياخد الواجب

هجيبوا لحد بيته

و يبقي درس خصوصي

شكرا

و يا ريت مكنش طولت عليكم

مستني الردود

و ربنا يستر

إضراب الصغار

يــــــــــــــاه

كانت أحسن أيام حياتي

كان عندي وقتها حوالي 14 شهر

يعني زي ما تقولوا سنة وشهرين

لما كتبت أشهر موضوع بحياتي

وتنا قشنا فيه أنا والعديد من المدونين

كان عنوان الموضوع

الريلاكس الريلاكس

لنخلي عيشتكم إكس

إكس يعني (x) غلط

و وقتها قمنا بالعديد من المظاهرات

و قررنا نعمل إضراب

راح ضحيته كتير من أصحابي المدونيين

وكان مصيرهم الأحداث

(عشان كانوا لسه صغننين)

و

بناءا علي رغبة الكثير من أطفال اليوم

قررت إعادة نشر الموضوع

للمرة التانية
بعد حوالي 20 سنة

-----------( إضراب الصغار )----------

قرار رقم (1)

عايزين نصحي في هدوء وريلاكس

قرار رقم (2)

نضفولنا منخيرنا بشويش وبلاش الفحت

قرار رقم (3)

لا للتمارين العنيفة إحنا لسه نونو

قرار رقم (4)

نعم للتدليك و لا للتفكيك

قرار رقم (5)

شيلونا صح إحنا مش كياس قطن

قرار رقم (6)

لا للإستحمام .. واء واء..

ملحوظة رفيعة

إستخدموا شامو جونسن

قرار رقم (7)

نشفونا براحة يا بشر
خلي عندكم شوية ريلاكس

قرار رقم (8)

ماشي دوقوا أكلنا

بس مش تلهطوه

و حصل جدل كبير علي القرار رقم (8)

إلي أن أتي من أرض لبنان الشقيقة

مدون حبيب

وقال بصوت عالي

عشان ميعرفوش يكلوا أكلنا تاني

لازم ننادي ونقول

لا للرضاعة الصناعية

نعم للرضاعة الطبيعية

طبعا

كلنا شكرناه وحيناه

وبعد الإجتماع

قدم لنا كلنا دعوة لزيارة بلاده

عشان نساعده في نشر رسالتة

طبعا

كلنا وافقنا

و وقفنا معاه وقفة رجل واحد

وكان ده التعديل الوحيد اللي حصل

و سمناه قرار رأم (8 معدل )

قرار رقم (9)

لا للإستزراف الزايد

و انتوا بتلعبونا

وأحنا بنعيط وأنتوا فكرينا بنضحك

و يا ريت تراعوا سننا

قرار رقم (10)

لا للكفولة

نعم للبامبرز


ملحوظة رفيعة

يا ريت تراعوا شعورنا وانتوا بتغيرولنا




قرار رقم (11)


رجاء بلاش بخل

لا لإستخدام حزام الكبار

نعم للإستخدام كرسي الأمان

للأطفال





قرار رقم (12)


مش عايزين نروح معاكم

و أنتوا بتتسوقوا

لا للشوبينج





قرار رقم (13)


نبوس إيدكم

مش عايزين نفسنا يتكتم

غطونا بشويش

خليكم ريلاكس



و بعد كل القرارات دي

قررنا الأتي
لو مش هتعملونا بريلاكس

هاتوا لنا

مربية كويسة

و يا ريت تستنضفوا


و شكرا

بإيدك تخلي طفك ريلاكس

و

بإيدك ممكن يكون العكس