04‏/10‏/2008

قال جامعة قال









الأول كل سنة و أنتم طيبين للي ملحقتش أعيد عليهم و لكل الموجودين




عـــــــــــــــــــام دراســــــــــــــي جديـــــــــــــــد



كل سنة و أنتم طيبين



واحد أو واحدة ظريف أو لطيفة (مش المغنية) بيقولوا لي

يا عم نموسيتك كوحلي أنت لسه فاكر
ده الدراسة بدأت من الأسبوع اللي فات

عارف و الله بس بالنسبة ليا و لملايين الحشود الغفيرة
الدراسة من الإسبوع ده

جامعة تاني و تالت و رابع و خامس
إرحمونا بقي و ادونا الشهادة خلونا نخلص

أنا عن نفسي بحس إن الجامعة أو كليتي العملية
ذي ما بسمعهم و هم بيقولوا لنا

بحسها مكان للتعتيم مش التعليم أبدا
بس الحاجة الوحيدة اللي بستفاد منها هي التأمل

مهو بيني و بينكم التأمل برده من شروط الريلاكسيشن

اللي أنا دايما و أبدا واجع دماغكم بيه



بس حقيقي بتيجي عليا أيام مبقدرش أسيطر فيها علي نفسي من كتر الغيظ


لما تصحي من النجمة عشان تعرف تركب مواصلاتك بالعافية

عشان تلحق المحاضرة الأولي


و بعد ده كله تلاقي الدكتور قاعد باللاب توب و عمال يلك

و إحنا طبعا فهمين كل حاجة إلا حاجة واحدة


هي المادة دي بتتكلم عن إيه أصلا


ماشي يا دكتور روح يا شيخ و تعالي بسرعة




و اللي يغيظ أكتر و أكتر إنه كلها محضرتين و يخلص الكورس

قال إيه عشان الميد تيرم

و أنا كان مال أهلي طاب فهمنا حاجة الأول و بعدين إمتحنا فيها

ده مش سلق بيض

المهم بعض ما تخلص المحاضرة طبعا تبدأ السكاشن من أول يوم

و تروح السكشن بتاعك تلاقي الأوضة مفيهاش حتي كرسي واحد

كله إما محجوز أو منقول لسكشن تاني و أنت و حظك يا تقعد يا تقضيها

و شوية تلاقي معيد زي العسل داخل عليك

و قبل ما يقول السلام عليكم

يطلع كشف الأسامي و ياخد الغياب .. هو إحنا في حضانة يا ريس



المهم يقعد قد ما يقعد و إحنا برده عايزين نفهم


أنت بتقول إيه


و كل اللي طالع عليه يا بشمهندس
الدكتور بيشرح في المحاضرة و أنا بطبق علي الشرح

يا عم طبق براحتك مبقتش تفرق سينا من سونيا

و علي الظهر كده يحسوا فجأة إن إحنا بني آدم و من حقنا حبة راحة

فتخرج اللي يروح يصلي الظهر جماعة بالمسجد
و اللي يروح الكافيتريا و اللي يروح في داهية
و اللي ياخدها من قصيرها و يروح قبل نهاية اليوم

و أنت ماشي في وقت الريست و معدي علي الكليات الرايقة
تحس بالإحباط و الذل

لما تبقي مش قادر تاخد نفسك من الطلوع و النزول طول اليوم في كليتك

وتيجي تلاقي الأمامير دول قاعدين بالجنينة و بيلعبوا صلح

(لعبة مسلية جداااا)



ربنا يعينكم و يديكم الصحة و ياخد مننا و يديكم

قولوا آمين


ساعتها الواحد بيحس بالندم إن دخل هندسة

و أصبر نفسي و قول يا واد بكرة تبقي باش مهندس قد الدنيا و البحر

بس هو أمتي بكرة ده ؟!!!!!!!!

و تتمشي شوية و تعدي علي أصحابك بالكليات اللي حوليك

و تلاقي الواد ميشو قاعد مع البت لولو

و ماسكين كتاب قال إيه بيذاكروا اللي فاتهم

و إحنا لسه في أول يوم طاب إيه بقي اللي فاتهم

نفسي أعرف



كل ما قول لحد كده يقول ليا بكرة يجي اليوم و تعرف

طاب هو إمتي بكرة ده ؟!!!!!!!

و في آخر اليوم و أنت مروح تبقي عايز اللي يشيلك كلك علي بعضك

و يرميك في السرير


و لما تيجي تفتح الكتب عشان تشوف اللي خدته النهاردة

تلاقي كل حاجة في الباي باي


و تحس إنك مكنتش في المحاضرة من أساسه

و إن الدكتور مكنش موجود


و تبدأ تتخيل حاجات عجيبة بعيد عنكم



علي العموم سامحوني طولت عليكم شوية


بس أعمل إيه


قال جامعة قال





كلمة Relaxation


*********************


حب ما تعمل حتي تعمل ما تحب


و هي الدنيا إيه غير حب و حنان و حاجات صغيرة فوق بعضها


كل سنة و أنتم طيبين و عام دراسي سعيد علينا و عليكم يا رب


و متنسوش تشربوا اللبن الصبح يا حلوين يا أممير


cold air

هناك 35 تعليقًا:

محمد فاروق الشاذلى يقول...

هى أيام ستمر إن شاء الله بخير عليك وصدقنى بعد أيام الجامعة ماتخلص وتبتدى تشتغل وتشيل مسئولية هاتفتقد الأيام دى قوى

فارس بلا جواد يقول...

أنا رأيي يا حازم اذا كنت شايف أيام الكلية كده يبقي تدور علي وسيلة مناسبة للانتحار قبل ما تخلص وتطلع للدنيا الواسعة
وبعدين مالك ومال الواد ميشو والبت لولو؟
عيال مجتهدة ربنا يوفقهم .. بلاش النفسنة اللي عندك دي ههههههههههه
ربنا يكرمك وتخلص بس رأيي بجد حاول تستمتع بالأيام دي لأن هيجي يوم وتقول لنفسك انها كانت احلي ايام عمرك
تحياتي

Cold air يقول...

قلب مصري

عارف و الله بس أنا حبيت أهظر شوية بمناسبة السنة الجديدة و بشكرك جدا علي الدعوة الجميلة دي و ربنا يسمع منك و تكون سنة سعيدة علينا كلنا و ربنا يقدرك و تقدر تكون قد كل المسؤليات اللي بتواجهك و يشرح لك صدرك و ييسر لك أمرك إن شاء الله

مع خالص تحياتي

Cold air يقول...

فارس بلا جواد

منور و الله يا دكتر و شكرا علي المتابعة و متخفش علي أخوك أنا قدها و نص و بالعكس أنا رجل عملي و أكتف أوي في الشغل بس بسترخم الدراسة شويتين

أما الواد ميشو و البت لولو
فربنا يوفقهم و لا تزعل نفسك بس و الله مش نفسنه و لا حاجة دول أصحابي مهما كان و ربنا يخليهم لبعض

و أكيد هحاول أستمتع علي قد مقدر

مع خالص تحياتي

EMMY BABY يقول...

ههههههههههههههههههههههههه والله ياحازم انا افتكرتك بتوصف كليتنا تقريبا نفس الوضع بس انا هغيظك بقى احنا بناخد الغياب فى الاخر ههههههههههههههههه

طب انتم مجهود ذهنى احنا بقى متمرمطين بمعنى الكلمة ذهنى وبدنى احنا بنمشى من فيصل لميدان الجيزة يوميا فى ربع ساعة علشان نروح من المحاضرة للسكشن والعكس

على رايك كلها ايام وبتعدى انا بسمع اصحابى فى كليات نظرى بحس انهم مش فى كلية بحس انهم بيتفسحوا


احنا بقى بدأنا من الاسبوع االى قبل العيد والايام اللى قبل العيد وواله العظيم الدكاترة داخلين بيقولوا يلا بسرعة متاخرين من اول دقيقة لاخر دقيقة كلام واحنا نكتب لما ايدينا بتورم

هههههههههههههههه كلنا لها ياحازم

تحياتى

ايمى

Cold air يقول...

Emmy

أخيرا يا إيمي حد نصفني و حس بيا
الحمد لله عشان الناس نتفتكرنيش حالة شاذة أو واحد منفسن ^_^

بس علي العموم الأيام دي مش هنعرف قيمتها إلا لما نتخرج من الجامعة و نبدأ السريان بسوق العمل

تحياتي لك يا إيمي و سنة دراسية سعيدة عليك و علينا يا رب

ساسو يقول...

ياعيني عليك ياحازم
والله ليك حق تتعقد من حياتك ومن الكليه
وانا اقول اخويه بيجي يسب في الكليه والدكاتره من ايه
ربنا يكون في عونكم والله
وتعدو منها علي خير
وتبقه باش مهندس قد الدنيا
يارب
كل سنه وانت طيب

Eman Henaish يقول...

آاااااه أنا لسة برده كنت مطحونة وهلكت طلوع ونزول علي السلالم علشان
المحاضرات والسكاشن

وبجد راسي كانت هتنفجر من كتر اللك والرغي بتاع الدكاترة

هي صحيح الدراسة متعبة فعلابس بجد أحسن من الفضي والفراغ بتاع الاجازة

أنا عن نفسي بحب أيام الدراسة :)

رغم أني كل يوم أعد أقول انا كان مالي ومال الكليات العملية مالها الكليات التانية ، صحابي مروقين وبيصحوا براحتهم وكمان بيخلصوا قبلي

ما علينا

سنة دراسية سعيدة ان شاء الله

yoyo يقول...

ههههههههههه عسل والله يا حازم
والله كلنا كنا كدا ايام الدراسة ونقول امته بقى نخلص وناخد المؤسفة على عمرها الشهادة دى ههههههههه

بس صدقنى والله لما تخلص هتقول ولا يوم من ايام الدراسة دى تانى ولمة الشلة والقعدة فى المحاضرة ولا انت فاهم اى حاجة خالص ولا انت عارف مين ابن مين من اصله ولا حتى الحاج ( الدكتور يعنى مش اقصد حاجة ) دا كان بيقول ايه هههههههههه والله كانت ايام جميلة عمرى ما هنسها ابدل بحلوها ومرها

ربنا يعينك بقى يالا اهوا هانت ربنا يفوقك يارب اه صحيح بلاش شغل القر والنق على العيال دا بقى جتكم البلة مليتوا البلد ههههههههههههههههه

دمت بكل خير
تحياتى
يويو

Cold air يقول...

ساسو

أهلا بيك يا ساسو علي Relaxation
و نورت المدونة في الطلة الأولي ^_^
متشكر علي شعورك الجميل و يا رب يوفق الجميع
و سنة سعيدة عليك يا ساسو

مع تحياتي

Cold air يقول...

eman

ازيك يا إيمان و الله ليك وحشة كبيرة و مبروك الصورة الجديدة للبروفيل
و أكيد أنت حاسة بيا و فاهمة قصدي عشان علم الأحياء المجهري اللي بتدرسي فيه ده بجد ربنا يكون في عونكم أنا موتي و سمي الأحياء دي ^_^

بس لو بتحبي الدراسة يبقي ربنا يهني سعيد بسعيدة و ربنا يوفقك و يجعلك أيامك كلها دراسة موفقة بإذن الله

و كل سنة و أنت بألف خير و good luck

مع خالص تحياتي

Cold air يقول...

yoyo

هه ^_^ هه ^_^ هه

معلش استحملونا شوية يا يويو منا بقالي فوق السبع شهور ريلاكس فلازم أغير و أقر عليكم شوية عشان مزهقش برده و التغيير مطلوب

^_^

و متقلقيش الحكومة بدأت ترش دلوقتي و أعدادنا في تناقص مستمر ههههههههه

مع تحياتي يا يويو

زى الهوا يقول...

شوف رغم انك متغاظ ومفروس وهتطق من كتر الغيط ومتنرفز جدا , إلا انى برده حاسة انك ريلاكس مش عارفة اذاى ضربت العصافير الكتيرة دى بنفس الحجر الواحد دا

عموما كل سنة وانت طيب وعام دراسى سعيد , وبعدين دا كلامك فكرنى اووووووووى بايام زمان , ايام ماكنت صغيرة زيك كدة وف كلية , وكنت وانا راجعة احس إن رجلى دى بتتجر منى , وإن النملة فى الوقت دا عندها القدرة جدا إنها تكعبلنى , ودماغى كانت بيطلع منها صواريخ , والحر كله بيتجمع حوايا فى ساعة الرجوع دى , وياه بقى لو حد بس سند عليا فى المترو ولا عمل حركة مقرفة , تلاقينى انا يابريئة ياللى صوتى ما بيطلعش عمالة باسرسع وازعق وال ايه باتخانق

مش هاقولك غير الله يكون فى عونك , واحب اطلعلك لسانى واقولك : انا فى نعمة

Cold air يقول...

زي الهوا

و الله لولا شوية الريلاكسيشن اللي بحاول أصبر نفسي بيهم علي أيام الدراسة كنت طرقعت و فرقعت و براحتك يا ستي ما أنت بتبصي علينا دلوقتي من مدرجات المتفرجيين لكن بجد روح الدراسة بتبث في الواحد الحياة و النشاط اللي الواحد نسيهم من أيام الأجازة

و ماشي يا موحة غيظي فيا بكرة يجيلك يوم و أعرف آخد حقي منك

مع تلت تربع تحياتي و الربع الباقي منتيش واخداه و لاقولك خلي الربع الباقي معاك منتي بقيتي فاضية و أهي حاجة تسلي

هه ^_^ هه ^_^ هه

saragebaly يقول...

cold air

هههههه الله يكون في عونك ويطلعك منها على سلااام يارب

فترة الجامعة برغم من انها بتكون متعبة الا انها ممتعة جدا وبتكون ذكريات جميلة جدا

انا بقى تقريبا كدة مش بروح الجامعة الا على ايام الامتحانات وبسسسسس

اما لسكاشن فبيكون يوم واحد في الاسبوع وطبعآ مش بروح
احيانا يكون الدكتور غتت حبتين وتلاقيه بياخد حضور وغياب

فاكر انه هيجبرنا اننا نحضر والكلام دة بس على مين بقى ؟؟!!

بظبط بنت او اتنين من صحباتي واخليهم يحضروا مكاني واول ما ينادي سمي واحدة منهم تقف وهو ولا بيسأل عن اي حاجة

اما بقى لو حب يزود الغتاتة ويعمل امتحانات فبرضو بنقدر عليه

نفس البنت بظبطها تمتحنلي
وكمان اشترط عليها تنظم الورقة وتكتب بخط كويس طبعآ

والله الواحد بيتعب ايام الجامعة دي

بس للاسف ايام الامتحانات مش بلاقي حد اظبطه لاني بكون بظبط نفسي
بتكون ايام طحن والله

مش بقولك الواحد بيتعب ههههه

اهي هانت آآآآخر سنة ونخلص
بس يارب نخلص على خير يارب

سارة

عاشقة الوطن يقول...

السلام عليكم

ازيك ياحازم
هو اى نعم انا كنت فى تجارة بس مش اى تجارة ديه تجارة انجليزى يعنى برضه شغل وطلوع عين وامتحانات ميدتيرم وغياب بس الغياب بقي كنا بناخده فى المحاضرات والسكاشن اصلا ولا لها لازمة
تخيل بقي كل المحاضرات لازم تبقي حاضر فيها
فاهم او مش فاهم حاجة من الدكتور
لازم تبقي حاضر برضه
وزى حالاتك كده محاضرتين والميديتيرم يشتغل وانت ياعينى ماانتاش عارف راسك من رجليك
وبعدها باسبوعين بالظبط امتحانات اخر السنة
ايه اللخبطة ديه مش فاهمة بصراحة
وطبعا الواحد اصلا مبيبقاش قادر يكمل المحاضرات بس غصب عنك هتكملها هتكملها وانت بتنام بقي وانت مضروب
مش بمزاجك يعنى

وهو اى نعم انا الحمدلله خلصت السنة ديه والمفروض انى خلصت
بس انا غاوية تعب قلب قدمت على تمهيدى ماجستير وهأكمل دراسة السنة ديه برضه ان شاء الله
ومش عاوزة اقولك بقي عندنا الدكاترة بيعملوا ايه لما يعرفوا ان الطالب الفلانى بتاع الدراسات العليا اصلا تجارة "انجليزى" مش عاوزة اقولك انهم بيطلعوا عينه ومش بيسبوه فى حاله بيقوموا بالواجب التمام معاه
ولان اصلا الدراسات العليا بيكملوا عربي وكلهم دكاترة تجارة عربي ومغلولين جدا من بتوع انجليزى
لييييييييييه؟؟؟ معرفش

فربنا يصبرنا ويصبر سيادتك ويصبر كل اللى بيدرسوا لسه

وخلى مشوار المواصلات ده على جنب لوحده لانى لو فتحت فيه مش هاخلص انت عارف بقي اللى فيها

ربنا يوفقك يابنى وتخلص على خير وتخلص نهائيا من الدراسة والمذاكرة

وتقول يااااااه كانت ايام وعدت

انا طولت عليك اوى واتكلمت كتير
اسيبك بقي مع المحاضرات والمذاكرة ربنا معاك

سلاااااااام

حبيبه يقول...

ازيك ياحازم
اولا كل عام وانت بخير
ثانيا انت بتتكلم عن اللي بيحصل مع اختي هي في كلية علاج طبيعي بالقاهرة ولاننا مش من القاهرة بتعاني برضه في المواصلات والمحاضرات وكل اللي انت بتقول عليه علشان كدة انا باعذرك وباقولك ربنا معاك وبالنجاح ان شاء الله

تسنيم محمود حسين يقول...
أزال المؤلف هذا التعليق.
PrInCeSS BeRy يقول...

عثل ههههههههههههه فكرتنى بالدراسة والله كانت ايام وعدت تيارارار والحمد لله انها عدت ربنا يعينك بس بلاش تعمل فى نفسك حاجة اععمل فيهم همة التار ولا العار دكاترة نوووووووو

Bob يقول...

باشا
قال جامعة قال
فعلا تعبير فى مكانه يبين مدى وكسة التعليم فى مصر ومدى تطبيقها تطبيقا صحيحا
احيانا الواحد ساعات بيفكر هو العيب فيناولا العيب فى الكلية وخصوصا بقى زى مابتقول الكليات العملية زى هندسة وخلافه
اقولك احسن حاجة للواحد انه ميفكرش من اساسه ويعقد نفسه ونخلى الحياة وردية وننفض لاى حاجة توجع اعصابنا
سلام ياصاحبى
متلومنيش انى تاخرت فى التعليق
المهم علقت وخلاااااص
بوب

ندا منير يقول...

ههههههههههههه
ايه دا
دا انا لسة فى اولى
كدة هيجيلى ااحباط
هههههههههههههه
لالا انا بهزر

بس على فكرة
مش كل كلية بنفس الوصف دا
الحمدلله انا عندى فى الكلية الداكترة بجد فى قمة الاحترام والضمير وبجد بيشرحوا بذمة قوى قوى
كاننا فى ثانوى
وبنفهم منهم كويس
انا ببقى مستمتعة وهما بيشرحوا

بس يارب دكاترة كل سنة تبقى كدة
هههههههههههه

د. مونى يقول...

حازم وحشتنى جدا جدا جدا
واسفة على التأخير بس والله غصب عنى
وحشتنى مدونتك اوى
وبمناسبة البوست
انا دلوقتى بتمنى ييجي يوم واحد من ايام الجامعة
بجد انا ضيعت احلى سنين عمرى فى الجد
من سنة اولى وانا بتدرب صحافة وبجرى هنا وهناك ومحستش بالجامعة ومكانش ليا صحاب كتير
المهم الحمدلله
بس ايه ده؟
ههههههههههههه
الحمدلله ان انا مدخلتش هندسة
هههههههههههههه
سلام ياحزوووم

كيكى عوووووو يقول...

هههههههههههههههههههههه
هههههههههههههههههههههه
تسهتل حدقالك خش هندزة مرة واحدة
طب كنت خش طب
ههههههههههههههههههه
هدزة يا حازم هندزة
ال هندزة ال
هههههههههههه
لا بجد بجد ربنا ىمعاك ويسعدك..يلا كلها ايام وان شاء الله تتخرج
اية دة ايام اية؟
اقصد سنيييييييييييييييييين
ههههههههههههههههههههههه
معلش معلش ربنا معاك يارب
عووووووووووووووووووووووو

نور الدين (محمد الجيزاوى) يقول...

اولا ازيك وواحشتنى جدا
وكمان زعلان منك لانك مبتسألش

اما الجامعة بقى فهى احد المعضلات اللى هتدخلها وتخرج منها وانت بتقول هو ايه اللى حصل
تحياتى
نور الدين محمود

عايش... ولكن !!!! يقول...

ههههههههههههههههه
يخرب عقلك يا حازم
تعرف انا بقرا البوست وحاسس انك انت اللى بتقراهولى بطريقتك دى هههه
جيت ع الجرح والله
نفس اللى بعانى منه
وسؤال مضايقنى اوى ليييييييييييه؟
حاجات كتير السؤال ده فيها
ليه بندرس حاجات مش تبعنا
ليه الدكاتره مبنفهمش منهم حاجه
ليه اصلا دخلنا هندسه ههههههههه
وليه وليه
وسمعنى احلى سلام صعيدى شحط محط
يلا سلام بقا

عايش... ولكن !!!! يقول...
أزال المؤلف هذا التعليق.
زى الهوا يقول...

فينك ؟؟؟؟؟؟؟؟

""""" يقول...

انت مستعجل ع الشهاده له
يابنى انت دلوقتبتشتغل باش طالب اد الدنيا
عايز تسيب شغلك وتبقى عاطل ؟

انا خلصت واخدت الشهاده بس اهو مبعملش حاجه
ليا واحده صاحبتى بقى مش عايزه تخلص لحس تزهقمن اعدة البيت
وكل سنه تيجى يبنتى انتى مش اويهخلصى بقى
تقول لي انتوا عايزنى اعد فى البيت زيكو
مانا زى الفل اهو طالبه اد الدنيا !!

وحشنى كلامك يا حازم
ربنا يوفقك يارب وتتخرج بس ساعتها هتعر انك كنت عايش احلى ايام فى الجامعه

""""" يقول...

صحيح الموضوع قديم شويه
انت الدراسه اخدتك اوى كده ؟

ميرام يقول...

هههههههههههه
البوست لذيذ
بس هندسة مش تعذيب للدرجادي (:
المهم ريلاكس ريلاكس ..
وكلو بيعدي (:
(مش حرفيا يعني )
هههههههه
تحيـــــــــــــاتي

Eman Henaish يقول...

كل سنة وانت طيب

عيد سعيد باذن الله

kochia يقول...

(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)

yoyo يقول...

طولت الغيبة اوى يا حازم

يارب تكون بالف خير يارب

ياريت ترجع تانى و تور مدونتك وتنور كل المدونات من تانى

تحياتى
يويو

زى الهوا يقول...

يااااااااااااااه بقالك كتير اوى

يارب يكون المانع من دخولك خير

dalia يقول...

مدونة خفيفة الظل قوي بس ياخسارة روحت فين ؟؟


Relax على الأريكه & Enjoy بأبو تريكه

Relax على الأريكه & Enjoy بأبو تريكه
Relax على الأريكه & Enjoy بأبو تريكه